মুখ্য পৃষ্ঠা
06/04/25
15:18
•এইবাৰ ফাগুন আহক বিপ্লৱী হৈ•
স্বাধীনতাৰ জয় গান গাই
ৰাজপথত এদল বন্দুকধাৰি জোৱান |
প্ৰতিবাদৰ ধ্বনিৰে আকাশ কঁপাই
দুহাতত লৈ হিংসাৰ শিখা
ওলাই আহে জনগণ |
ধৰ্ষিতা নাৰীৰ কিমান চকুলোৰ বিনিময়ত
স্বাধীন হয় ৰাজপথ
কিম্বা নিশাৰ এন্ধাৰ ?
নিৰ্যাতিতা আইৰ বুকুত বাৰুদেৰে হানি
আকাশত উৰেনে স্বাধীনতাৰ নিচান ?
তেজৰ বিনিময়ত স্বাধীনতা দিবলৈ
এতিয়া যে নেতাজী নাই ।
দুহাতত বিজয়ী পতাকা উৰাই
ঘুৰি আহিব নোৱাৰে কনকলতা ।
ফাগুনৰ আকাশত জ্বলিবনে মদাৰৰ জুই ?
নে জ্বলিব কোনো গুলীবিদ্ধ ডেকাৰ
দেহ ?
ফাগুন , তই স্বাধীন হৈ আহ
মলয়াত লৈ আহ সুখৰ বাতৰি
দেশৰ বাবে....
ধৰ্ষিতা গাভৰু কিম্বা নিৰ্যাতিতা নাৰীৰ
বুকুত
চতিয়াই দে পলাশৰ ৰং ।
শিমলু তুলাৰ দৰে ,
আৰু শুভ্ৰ নকৰিবি
ফুল শয্যা নিশাত ন কন্যাৰ দেহ ।
শান্তিৰ চিঠি হৈ উৰি আহ পচোৱাত
কবিতা হৈ বোৱাই দে স্বাধীনতাৰ বীজ ।
© ৰাজু কলিতা
02/01/15
